رییس اجرایی با رییس جمهور تاجیکستان دیدار کرد

رییس اجرایی افغانستان با رییس جمهور تاجیکستان دیدار کرد
داکتر عبدالله رییس اجرایی افغانستان امروز (پنجشنبه ۱۹ میزان ۱۳۹۷) در حاشیه‌ی اجلاس سران حکومت‌های سازمان همکاری شانگهای با امام علی رحمان رییس جمهور تاجیکستان در قصر ملت دیدار کرد.

رییس جمهور تاجیکستان در این دیدار تشریف آوری رییس اجرایی را به تاجیکستان برای اشتراک در هفدهمین اجلاس سران حکومت‌های سازمان همکاری شانگهای خوش آمدید و خیر مقدم گفت.
رییس جمهور تاجیکستان در ادامه صحبت‌های خود علاوه کرد که کشورش به روابط با افغانستان به عنوان دوست و همسایه اهمیت فراوان قایل است.
امام علی رحمان در ادامه افزود که کشورش وضعیت در افغانستان را دنبال می‌کند و امنیت و آرامی در تاجیکستان و منطقه را در گرو امنیت و آرامی در افغانستان می‌داند.

رییس اجرایی با تشکر از استقبال گرم آقای امام علی رحمان، تاجیکستان را از دوستان و متحدان استراتژیک و نزدیک افغانستان خواند و از میزبانی نشست سران حکومت‌های شانگهای توسط تاجیکستان قدردانی کرد.

در این نشست دوطرف در باره امنیت، مبارزه مشترک با دهشت‌افگنی، قاچاق موادمخدر، همکاری و همگرایی منطقه‌ای، روابط منطقه‌ای افغانستان، افزایش دادوستد بازرگانی و جلب همکاری کشورهای منطقه برای تأمین صلح به رهبری و مالکیت مردم افغانستان به بحث و تبادل نظر پرداختند.

کد (10)